28. Oct 2025-də dərc edilib
"Azərbaycan sığorta sektorunda ən çox satılan məhsul avtomobillərin icbari sığortasıdır, çünki cərimə sanksiyaları ilə tənzimlənir. Kasko sığortası isə könüllü olduğundan populyarlıq qazanmır və satış həcmi aşağıdır".
Bunu MAY.AZ-a açıqlamasında sığorta mütəxəssisi Şahin İsmayılov bildirib.
O, qeyd edib ki, İcbari sığorta haqqı qanunla müəyyən olunur və şirkətlər fərdi qiymət təyin edə bilməz. 2022-ci ildə tətbiq olunan yeni qaydalarla qiymətlər avtomobilin mühərrik həcmi, istehsal ili, sürücünün yaşı və təcrübəsi, istifadə bölgəsi və etibarnamələrin sayı nəzərə alınaraq hesablanır. Bu, bazarda stabillik yaratdı, amma qiymət artımını sürücülər narazılıqla qarşıladı:
"Kasko sığortasında isə qiymət hər şirkət tərəfindən fərdi müəyyən olunur. Avtomobilin yaşı, bazar qiyməti və istifadə məqsədi əsas rol oynayır; şəxsi istifadə üçün sığorta haqqı biznes avtomobillərinə nisbətən daha aşağıdır".
